՛՛Համակարգիչ յուրաքանչյուր երեխայի համար՛՛ բարեգործական հիմնադրամը հիմնվել է Երևանում 19.07.19 թ.:

Հոգաբարձուների խորհուրդը այս պահին կազմված է երեք անդամից: Տնօրենի ժամանակավոր պաշտոնակատարն է՝ Հիմնադրամի հիմնադիր՝ Յուրա Սողոյանը:

Հիմնադրամը չի հետապնդում որևէ շահույթ: Ողջ աշխատանքը կապված Հիմնադրամի գործունեության հետ կատարվում են կամավորների կողմից հասարակական հիմունքներով:

Մենք ծրագրում ենք կատարել նվիրատվություններ դպրոցներին, սերտ համագործակցելով ԿԳՄՍ և Արցախի ԿԳՍ նախարարությունների հետ:

Մենք ցանկանում ենք ներդնել մեր մտավոր, ֆիզիկակական և ֆինանսական հնարավորությունները, որպեսզի հնարավորինս կարճ ժամկետներում ապահովվենք ժամանակակից համակարգիչներով Հայաստանի բոլոր այն դպրոցները, որտեղ դեռևս չկան համակարգիչներ կամ դրանք շատ հին են:

Մենք համոզված ենք, որ՝

- Մեր երկիրը կլինի այնքան հզոր և անվտանգ, որքան կրթված և զարգացած կլինեն նրա ապագա սերունդները:

- Անհատի, և ըստ այդմ հայ ժողովրդի կենսակերպը կլինի այնքան բարձր, որքան բարձր կլինեն նրա կրթվածությունն ու գիտակցությունը:

- Իրավունքների գիտակցումն ու հնարավորությունների ընդլայնումը և դրանք պաշտպանելու ունակությունը անհատի կողմից հանդիսանում է ժամանակակից քաղաքացիական հասարակություն կառուցելու կարևորագույն անկյունաքարը:

- Քաղաքացիական հասարակությունն է այն գրավականը և երաշխիքը, որը կապահովի մեր երկրի շարունակական զարգացումը և ամենաբարձր չափանիշներին համապատասխանող ժողովրդավարական պետության ստեղծումը:

Ահա այս գիտակցությամբ ենք մենք ձեռնամուղ եղել այս բարեգործական հիմնադրամի ստեղծմանը:

Նվիրաբերվող համակարգիչների չափորոշիչները, ընդունվել են ԿԳՄՍ նախարարության ՛՛Կրթական տեխնոլոգիաների ազգային կենտրոնի՛՛ հետ համատեղ որոշմամբ: Առաջիկա տարիների ընթացքում, այս համակարգիչները թույլ կտան ողջ ծավալով կատարել կրթական ծրագրով նախատեսված աշխատանքները: Հետագայում այս չափորոշիչները ավելի կբարձրանան:

Հիմնադրամի հիմնադիրը որդեգրել է սկզբունք, որ անձնապես տանը և աշխատավայրում չի օգտագործի համակարգիչներ, որոնք չափորոշիչներով գերազանցում են նվիրաբերվող համակարգիչներին։